حملة أخرى... زعمة علاش...؟؟؟ (1)

يقول القايل: قداش من حملة تعدات على روسنا وعطاتنا أمل ومن بعد ما لقينا شيء، قداش من مرة نحطو ثقتنا في حد ومن بعد نجيو نضربو عليه ما نلقاوشو...

وأنا نقول للقايل: حقك، وبرشا مرات خممت كيفك، بقى ايجا نوضحلك حاجة:

أولا: برشا حملات وصلت لاهداف غير الله غالب في استراتيجيات الاتصال عندنا مازلنا ما نركزوش على مخرجات الحملات وهاك علاش برشا يحسوها فوعة تاع ناس هاربة بيهم فرس وطفات

ثانيا: صحيح ثمة برشا حملات ما حققتش أهدافها وهذا مش من اللي عملو الخدمة وآمنو بيها آكاهو، هذا من الفضاء اللي تخلقت فيه الحملة وغياب التشجيع والتحفيز وتلقى برشا يجيو من الأول من باب حب الاطلاع ومن بعد يفقدو حماسهم، وفي النهاية نلقاو كعبتين وكعبة بلاشي امكانيات وبلاشي دعم معنوي قاعدين يعانيو في الاحباط.

ثالثا: الحملة ما ينجحهاش واحد وحدو ولا مجموعة مؤمنين بيه، الحملة تنجح وقت برشا برشا ناس يدعموها خاطر عندهم دوافع معنوية أو مادية وعليه عمرو ما نحكمو على حاجة عدينا الوقت الكل نتفرجو فيها من بعيد والا حطينالها علامة اعجاب مرة والا برطاجينا مرتين وحتى من غير ما نعبرو على موقفنا من موضوعها وأهدافها (بالنقد أو الثناء)

رابعا: ما ثمة شيء يجي بالساهل، وما ثماش حاجة تخدمها اليوم تلقى نتيجتها غدوة والحملة اللي شعارها "أنا يحيى ومن حقي نحيا" حاطة لروحها زوز مخرجات مهمين: جمعية مختصة، ومشروع اصلاح شامل يمس برشا مجالات ويحمل لبرشا أطراف مسؤوليتهم. الحاجتين هاذم يعتبرو خطوة عملاقة في حد ذاتهم وباش يحلو برشا أبواب من أجل وضع استرتيجية فعالة للنهوض بواقع الاعاقة وذوي الاعاقة في بلادنا
---
وبالنظر إلى ما تقدم أنا كمواطنة نؤمن بحق زغارنا في مستقبل خير برشا من واقعنا ندعو الجميع مواطنين ومختصين ونقابيين ونشطاء وإعلاميين إلى التفكير العميق في الموضوع وأتمنى أن تصلني تعليقات أو رسائل شجاعة ومسؤولة في نقدها أو قوة اقتراحها ووعيها
شكرا لكم
رفيقة منتصري
عن لجنة المساندة لحملة الحق في الحياة لصالح الاطفال ذوي الاعاقة
‫#‏حملة_الحق_في_الحياة_لصالح_الاطفال_ذوي_الاعاقة‬
‫#‏أنا_يحيى_من_حقي_نحيا‬
‫#‏أنا_يحيى_نحب_نحيا‬
‫#‏بدلي_قانون_الكنام‬
‫#‏العلاج_الوظيفي_ضرورة_حياة‬
‫#‏الاحاطة_النفسية_ضرورية_مش_فيس_والا_مزية‬
‫#‏طبق_الاتفاقيات_الدولية‬
‫#‏وفرلي_وسائل_الادماج‬
‫#‏أعطيني_شوية_من_وقت_بابا_وأمي‬
---
تابعونا على:
https://www.facebook.com/yahyaana
https://www.facebook.com/groups/476994055801991
https://twitter.com/YahyaEnayahya
https://plus.google.com/u/1/116461936182508708240/
http://enayahya.blogspot.com/
https://www.youtube.com/channel/UCbdzibTxcS3bXAUYx48WXQw
اتصلوا بنا على:
93583110
jesuisyahya@gmail.com